א. א אף-לזאת יחרד לבי ויתר ממקומו
ב. ב שמעו שמוע ברגז קלו והגה מפיו יצא
ג. ג תחת-כל-השמים ישרהו ואורו על-כנפות הארץ
ד. ד אחריו ישאג-קול-- ירעם בקול גאונו ולא יעקבם כי-ישמע קולו
ה. ה ירעם אל בקולו נפלאות עשה גדלות ולא נדע
ו. ו כי לשלג יאמר-- הוא-ארץ וגשם מטר וגשם מטרות עזו
ז. ז ביד-כל-אדם יחתום-- לדעת כל-אנשי מעשהו
ח. ח ותבוא חיה במו-ארב ובמעונתיה תשכן
ט. ט מן-החדר תבוא סופה וממזרים קרה
י. י מנשמת-אל יתן-קרח ורחב מים במוצק
יא. יא אף-ברי יטריח עב יפיץ ענן אורו
יב. יב והוא מסבות מתהפך בתחבולתו לפעלם כל אשר יצום על-פני תבל ארצה
יג. יג אם-לשבט אם-לארצו-- אם-לחסד ימצאהו
יד. יד האזינה זאת איוב עמד והתבונן נפלאות אל
טו. טו התדע בשום-אלוה עליהם והפיע אור עננו
טז. טז התדע על-מפלשי-עב מפלאות תמים דעים
יז. יז אשר-בגדיך חמים-- בהשקט ארץ מדרום
יח. יח תרקיע עמו לשחקים חזקים כראי מוצק
יט. יט הודיענו מה-נאמר לו לא-נערך מפני-חשך
כ. כ היספר-לו כי אדבר אם-אמר איש כי יבלע
כא. כא ועתה לא ראו אור-- בהיר הוא בשחקים ורוח עברה ותטהרם
כב. כב מצפון זהב יאתה על-אלוה נורא הוד
כג. כג שדי לא-מצאנהו שגיא-כח ומשפט ורב-צדקה לא יענה
כד. כד לכן יראוהו אנשים לא-יראה כל-חכמי-לב