א. א הן-תחלתו נכזבה הגם אל-מראיו יטל
ב. ב לא-אכזר כי יעורנו ומי הוא לפני יתיצב
ג. ג מי הקדימני ואשלם תחת כל-השמים לי-הוא
ד. ד לא- (לו-) אחריש בדיו ודבר-גבורות וחין ערכו
ה. ה מי-גלה פני לבושו בכפל רסנו מי יבוא
ו. ו דלתי פניו מי פתח סביבות שניו אימה
ז. ז גאוה אפיקי מגנים סגור חותם צר
ח. ח אחד באחד יגשו ורוח לא-יבא ביניהם
ט. ט איש-באחיהו ידבקו יתלכדו ולא יתפרדו
י. י עטישתיו תהל אור ועיניו כעפעפי-שחר
יא. יא מפיו לפידים יהלכו כידודי אש יתמלטו
יב. יב מנחיריו יצא עשן-- כדוד נפוח ואגמן
יג. יג נפשו גחלים תלהט ולהב מפיו יצא
יד. יד בצוארו ילין עז ולפניו תדוץ דאבה
טו. טו מפלי בשרו דבקו יצוק עליו בל-ימוט
טז. טז לבו יצוק כמו-אבן ויצוק כפלח תחתית
יז. יז משתו יגורו אלים משברים יתחטאו
יח. יח משיגהו חרב בלי תקום חנית מסע ושריה
יט. יט יחשב לתבן ברזל לעץ רקבון נחושה
כ. כ לא-יבריחנו בן-קשת לקש נהפכו-לו אבני-קלע
כא. כא כקש נחשבו תותח וישחק לרעש כידון
כב. כב תחתיו חדודי חרש ירפד חרוץ עלי-טיט
כג. כג ירתיח כסיר מצולה ים ישים כמרקחה
כד. כד אחריו יאיר נתיב יחשב תהום לשיבה
כה. כה אין-על-עפר משלו העשו לבלי-חת
כו. כו את-כל-גבה יראה הוא מלך על-כל-בני-שחץ