א. א ויען אליפז התימני ויאמר
ב. ב הנסה דבר אליך תלאה ועצר במלין מי יוכל
ג. ג הנה יסרת רבים וידים רפות תחזק
ד. ד כושל יקימון מליך וברכים כרעות תאמץ
ה. ה כי עתה תבוא אליך ותלא תגע עדיך ותבהל
ו. ו הלא יראתך כסלתך תקותך ותם דרכיך
ז. ז זכר-נא--מי הוא נקי אבד ואיפה ישרים נכחדו
ח. ח כאשר ראיתי חרשי און וזרעי עמל יקצרהו
ט. ט מנשמת אלוה יאבדו ומרוח אפו יכלו
י. י שאגת אריה וקול שחל ושני כפירים נתעו
יא. יא ליש אבד מבלי-טרף ובני לביא יתפרדו
יב. יב ואלי דבר יגנב ותקח אזני שמץ מנהו
יג. יג בשעפים מחזינות לילה בנפל תרדמה על-אנשים
יד. יד פחד קראני ורעדה ורב עצמותי הפחיד
טו. טו ורוח על-פני יחלף תסמר שערת בשרי
טז. טז יעמד ולא אכיר מראהו-- תמונה לנגד עיני דממה וקול אשמע
יז. יז האנוש מאלוה יצדק אם מעשהו יטהר-גבר
יח. יח הן בעבדיו לא יאמין ובמלאכיו ישים תהלה
יט. יט אף שכני בתי-חמר--אשר-בעפר יסודם ידכאום לפני-עש
כ. כ מבקר לערב יכתו מבלי משים לנצח יאבדו
כא. כא הלא-נסע יתרם בם ימותו ולא בחכמה