ב. ב לו--שקול ישקל כעשי והיתי (והותי) במאזנים ישאו-יחד
ג. ג כי-עתה--מחול ימים יכבד על-כן דברי לעו
ד. ד כי חצי שדי עמדי--אשר חמתם שתה רוחי בעותי אלוה יערכוני
ה. ה הינהק-פרא עלי-דשא אם יגעה-שור על-בלילו
ו. ו היאכל תפל מבלי-מלח אם-יש-טעם בריר חלמות
ז. ז מאנה לנגוע נפשי המה כדוי לחמי
ח. ח מי-יתן תבוא שאלתי ותקותי יתן אלוה
ט. ט ויאל אלוה וידכאני יתר ידו ויבצעני
י. י ותהי-עוד נחמתי-- ואסלדה בחילה לא יחמול כי-לא כחדתי אמרי קדוש
יא. יא מה-כחי כי-איחל ומה-קצי כי-אאריך נפשי
יב. יב אם-כח אבנים כחי אם-בשרי נחוש
יג. יג האם אין עזרתי בי ותשיה נדחה ממני
יד. יד למס מרעהו חסד ויראת שדי יעזוב
טו. טו אחי בגדו כמו-נחל כאפיק נחלים יעברו
טז. טז הקדרים מני-קרח עלימו יתעלם-שלג
יז. יז בעת יזרבו נצמתו בחמו נדעכו ממקומם
יח. יח ילפתו ארחות דרכם יעלו בתהו ויאבדו
יט. יט הביטו ארחות תמא הליכת שבא קוו-למו
כ. כ בשו כי-בטח באו עדיה ויחפרו
כא. כא כי-עתה הייתם לא תראו חתת ותיראו
כב. כב הכי-אמרתי הבו לי ומכחכם שחדו בעדי
כג. כג ומלטוני מיד-צר ומיד עריצים תפדוני
כד. כד הורוני ואני אחריש ומה-שגיתי הבינו לי
כה. כה מה-נמרצו אמרי-ישר ומה-יוכיח הוכח מכם
כו. כו הלהוכח מלים תחשבו ולרוח אמרי נואש
כז. כז אף-על-יתום תפילו ותכרו על-ריעכם
כח. כח ועתה הואילו פנו-בי ועל-פניכם אם-אכזב
כט. כט שובו-נא אל-תהי עולה ושבי (ושבו) עוד צדקי-בה
ל. ל היש-בלשוני עולה אם-חכי לא-יבין הוות