א. א אני הגבר ראה עני בשבט עברתו
ב. ב אותי נהג וילך חשך ולא אור
ג. ג אך בי ישב יהפך ידו כל היום {ס}
ד. ד בלה בשרי ועורי שבר עצמותי
ה. ה בנה עלי ויקף ראש ותלאה
ו. ו במחשכים הושיבני כמתי עולם {ס}
ז. ז גדר בעדי ולא אצא הכביד נחשתי
ח. ח גם כי אזעק ואשוע שתם תפלתי
ט. ט גדר דרכי בגזית נתיבתי עוה {ס}
י. י דב ארב הוא לי אריה (ארי) במסתרים
יא. יא דרכי סורר ויפשחני שמני שמם
יב. יב דרך קשתו ויציבני כמטרא לחץ {ס}
יג. יג הביא בכליתי בני אשפתו
יד. יד הייתי שחק לכל עמי נגינתם כל היום
טו. טו השביעני במרורים הרוני לענה {ס}
טז. טז ויגרס בחצץ שני הכפישני באפר
יז. יז ותזנח משלום נפשי נשיתי טובה
יח. יח ואמר אבד נצחי ותוחלתי מיהוה {ס}
יט. יט זכר עניי ומרודי לענה וראש
כ. כ זכור תזכור ותשיח (ותשוח) עלי נפשי
כא. כא זאת אשיב אל לבי על כן אוחיל {ס}
כב. כב חסדי יהוה כי לא תמנו כי לא כלו רחמיו
כג. כג חדשים לבקרים רבה אמונתך
כד. כד חלקי יהוה אמרה נפשי על כן אוחיל לו {ס}
כה. כה טוב יהוה לקוו לנפש תדרשנו
כו. כו טוב ויחיל ודומם לתשועת יהוה
כז. כז טוב לגבר כי ישא על בנעוריו {ס}
כח. כח ישב בדד וידם כי נטל עליו
כט. כט יתן בעפר פיהו אולי יש תקוה
ל. ל יתן למכהו לחי ישבע בחרפה {ס}
לא. לא כי לא יזנח לעולם אדני
לב. לב כי אם הוגה ורחם כרב חסדיו
לג. לג כי לא ענה מלבו ויגה בני איש {ס}
לד. לד לדכא תחת רגליו כל אסירי ארץ
לה. לה להטות משפט גבר נגד פני עליון
לו. לו לעות אדם בריבו אדני לא ראה {ס}
לז. לז מי זה אמר ותהי אדני לא צוה
לח. לח מפי עליון לא תצא הרעות והטוב
לט. לט מה יתאונן אדם חי גבר על חטאו {ס}
מ. מ נחפשה דרכינו ונחקרה ונשובה עד יהוה
מא. מא נשא לבבנו אל כפים אל אל בשמים
מב. מב נחנו פשענו ומרינו אתה לא סלחת {ס}
מג. מג סכותה באף ותרדפנו הרגת לא חמלת
מד. מד סכותה בענן לך מעבור תפלה
מה. מה סחי ומאוס תשימנו בקרב העמים {ס}
מו. מו פצו עלינו פיהם כל איבינו
מז. מז פחד ופחת היה לנו השאת והשבר
מח. מח פלגי מים תרד עיני על שבר בת עמי {ס}
מט. מט עיני נגרה ולא תדמה מאין הפגות
נ. נ עד ישקיף וירא יהוה משמים
נא. נא עיני עוללה לנפשי מכל בנות עירי {ס}
נב. נב צוד צדוני כצפור איבי חנם
נג. נג צמתו בבור חיי וידו אבן בי
נד. נד צפו מים על ראשי אמרתי נגזרתי {ס}
נה. נה קראתי שמך יהוה מבור תחתיות
נו. נו קולי שמעת אל תעלם אזנך לרוחתי לשועתי
נז. נז קרבת ביום אקראך אמרת אל תירא {ס}
נח. נח רבת אדני ריבי נפשי גאלת חיי
נט. נט ראיתה יהוה עותתי שפטה משפטי
ס. ס ראיתה כל נקמתם--כל מחשבתם לי {ס}
סא. סא שמעת חרפתם יהוה כל מחשבתם עלי
סב. סב שפתי קמי והגיונם עלי כל היום
סג. סג שבתם וקימתם הביטה אני מנגינתם {ס}
סד. סד תשיב להם גמול יהוה כמעשה ידיהם
סה. סה תתן להם מגנת לב תאלתך להם
סו. סו תרדף באף ותשמידם מתחת שמי יהוה {פ}