א. א משא נינוה--ספר חזון נחום האלקשי
ב. ב אל קנוא ונקם יהוה נקם יהוה ובעל חמה נקם יהוה לצריו ונוטר הוא לאיביו
ג. ג יהוה ארך אפים וגדול (וגדל) כח ונקה לא ינקה יהוה בסופה ובשערה דרכו וענן אבק רגליו
ד. ד גוער בים ויבשהו וכל הנהרות החריב אמלל בשן וכרמל ופרח לבנון אמלל
ה. ה הרים רעשו ממנו והגבעות התמגגו ותשא הארץ מפניו ותבל וכל יושבי בה
ו. ו לפני זעמו מי יעמוד ומי יקום בחרון אפו חמתו נתכה כאש והצרים נתצו ממנו
ז. ז טוב יהוה למעוז ביום צרה וידע חסי בו
ח. ח ובשטף עבר כלה יעשה מקומה ואיביו ירדף חשך
ט. ט מה תחשבון אל יהוה--כלה הוא עשה לא תקום פעמים צרה
י. י כי עד סירים סבכים וכסבאם סבואים אכלו--כקש יבש מלא
יא. יא ממך יצא חשב על יהוה רעה--יעץ בליעל {ס}
יב. יב כה אמר יהוה אם שלמים וכן רבים וכן נגוזו ועבר וענתך--לא אענך עוד
יג. יג ועתה אשבר מטהו מעליך ומוסרתיך אנתק
יד. יד וצוה עליך יהוה לא יזרע משמך עוד מבית אלהיך אכרית פסל ומסכה אשים קברך--כי קלות {פ}