א. א ובחדש השביעי באחד לחדש מקרא קדש יהיה לכם--כל מלאכת עבדה לא תעשו יום תרועה יהיה לכם
ב. ב ועשיתם עלה לריח ניחח ליהוה--פר בן בקר אחד איל אחד כבשים בני שנה שבעה תמימם
ג. ג ומנחתם--סלת בלולה בשמן שלשה עשרנים לפר שני עשרנים לאיל
ד. ד ועשרון אחד לכבש האחד לשבעת הכבשים
ה. ה ושעיר עזים אחד חטאת לכפר עליכם
ו. ו מלבד עלת החדש ומנחתה ועלת התמיד ומנחתה ונסכיהם כמשפטם לריח ניחח אשה ליהוה {ס}
ז. ז ובעשור לחדש השביעי הזה מקרא קדש יהיה לכם ועניתם את נפשתיכם כל מלאכה לא תעשו
ח. ח והקרבתם עלה ליהוה ריח ניחח פר בן בקר אחד איל אחד כבשים בני שנה שבעה תמימם יהיו לכם
ט. ט ומנחתם--סלת בלולה בשמן שלשה עשרנים לפר שני עשרנים לאיל האחד
י. י עשרון עשרון לכבש האחד--לשבעת הכבשים
יא. יא שעיר עזים אחד חטאת מלבד חטאת הכפרים ועלת התמיד ומנחתה ונסכיהם {ס}
יב. יב ובחמשה עשר יום לחדש השביעי מקרא קדש יהיה לכם--כל מלאכת עבדה לא תעשו וחגתם חג ליהוה שבעת ימים
יג. יג והקרבתם עלה אשה ריח ניחח ליהוה--פרים בני בקר שלשה עשר אילם שנים כבשים בני שנה ארבעה עשר תמימם יהיו
יד. יד ומנחתם--סלת בלולה בשמן שלשה עשרנים לפר האחד לשלשה עשר פרים שני עשרנים לאיל האחד לשני האילם
טו. טו ועשרון עשרון לכבש האחד--לארבעה עשר כבשים
טז. טז ושעיר עזים אחד חטאת מלבד עלת התמיד מנחתה ונסכה {ס}
יז. יז וביום השני פרים בני בקר שנים עשר--אילם שנים כבשים בני שנה ארבעה עשר תמימם
יח. יח ומנחתם ונסכיהם לפרים לאילם ולכבשים במספרם--כמשפט
יט. יט ושעיר עזים אחד חטאת מלבד עלת התמיד ומנחתה ונסכיהם {ס}
כ. כ וביום השלישי פרים עשתי עשר אילם שנים כבשים בני שנה ארבעה עשר תמימם
כא. כא ומנחתם ונסכיהם לפרים לאילם ולכבשים במספרם--כמשפט
כב. כב ושעיר חטאת אחד מלבד עלת התמיד ומנחתה ונסכה {ס}
כג. כג וביום הרביעי פרים עשרה אילם שנים כבשים בני שנה ארבעה עשר תמימם
כד. כד מנחתם ונסכיהם לפרים לאילם ולכבשים במספרם--כמשפט
כה. כה ושעיר עזים אחד חטאת מלבד עלת התמיד מנחתה ונסכה {ס}
כו. כו וביום החמישי פרים תשעה אילם שנים כבשים בני שנה ארבעה עשר תמימם
כז. כז ומנחתם ונסכיהם לפרים לאילם ולכבשים במספרם--כמשפט
כח. כח ושעיר חטאת אחד מלבד עלת התמיד ומנחתה ונסכה {ס}
כט. כט וביום הששי פרים שמנה אילם שנים כבשים בני שנה ארבעה עשר תמימם
ל. ל ומנחתם ונסכיהם לפרים לאילם ולכבשים במספרם--כמשפט
לא. לא ושעיר חטאת אחד מלבד עלת התמיד מנחתה ונסכיה {ס}
לב. לב וביום השביעי פרים שבעה אילם שנים כבשים בני שנה ארבעה עשר תמימם
לג. לג ומנחתם ונסכהם לפרים לאילם ולכבשים במספרם--כמשפטם
לד. לד ושעיר חטאת אחד מלבד עלת התמיד מנחתה ונסכה {ס}
לה. לה ביום השמיני--עצרת תהיה לכם כל מלאכת עבדה לא תעשו
לו. לו והקרבתם עלה אשה ריח ניחח ליהוה--פר אחד איל אחד כבשים בני שנה שבעה תמימם
לז. לז מנחתם ונסכיהם לפר לאיל ולכבשים במספרם--כמשפט
לח. לח ושעיר חטאת אחד מלבד עלת התמיד ומנחתה ונסכה
לט. לט אלה תעשו ליהוה במועדיכם--לבד מנדריכם ונדבתיכם לעלתיכם ולמנחתיכם ולנסכיכם ולשלמיכם