א. א טוב פת חרבה ושלוה-בה-- מבית מלא זבחי-ריב
ב. ב עבד-משכיל--ימשל בבן מביש ובתוך אחים יחלק נחלה
ג. ג מצרף לכסף וכור לזהב ובחן לבות יהוה
ד. ד מרע מקשיב על-שפת-און שקר מזין על-לשון הות
ה. ה לעג לרש חרף עשהו שמח לאיד לא ינקה
ו. ו עטרת זקנים בני בנים ותפארת בנים אבותם
ז. ז לא-נאוה לנבל שפת-יתר אף כי-לנדיב שפת-שקר
ח. ח אבן-חן השחד בעיני בעליו אל-כל-אשר יפנה ישכיל
ט. ט מכסה-פשע מבקש אהבה ושנה בדבר מפריד אלוף
י. י תחת גערה במבין-- מהכות כסיל מאה
יא. יא אך-מרי יבקש-רע ומלאך אכזרי ישלח-בו
יב. יב פגוש דב שכול באיש ואל-כסיל באולתו
יג. יג משיב רעה תחת טובה-- לא-תמיש (תמוש) רעה מביתו
יד. יד פוטר מים ראשית מדון ולפני התגלע הריב נטוש
טו. טו מצדיק רשע ומרשיע צדיק-- תועבת יהוה גם-שניהם
טז. טז למה-זה מחיר ביד-כסיל-- לקנות חכמה ולב-אין
יז. יז בכל-עת אהב הרע ואח לצרה יולד
יח. יח אדם חסר-לב תוקע כף ערב ערבה לפני רעהו
יט. יט אהב פשע אהב מצה מגביה פתחו מבקש-שבר
כ. כ עקש-לב לא ימצא-טוב ונהפך בלשונו יפול ברעה
כא. כא ילד כסיל לתוגה לו ולא-ישמח אבי נבל
כב. כב לב שמח ייטיב גהה ורוח נכאה תיבש-גרם
כג. כג שחד מחק רשע יקח-- להטות ארחות משפט
כד. כד את-פני מבין חכמה ועיני כסיל בקצה-ארץ
כה. כה כעס לאביו בן כסיל וממר ליולדתו
כו. כו גם ענוש לצדיק לא-טוב-- להכות נדיבים על-ישר
כז. כז חושך אמריו יודע דעת וקר- (יקר-) רוח איש תבונה
כח. כח גם אויל מחריש חכם יחשב אטם שפתיו נבון