א. א לץ היין המה שכר וכל-שגה בו לא יחכם
ב. ב נהם ככפיר אימת מלך מתעברו חוטא נפשו
ג. ג כבוד לאיש שבת מריב וכל-אויל יתגלע
ד. ד מחרף עצל לא-יחרש ישאל (ושאל) בקציר ואין
ה. ה מים עמקים עצה בלב-איש ואיש תבונה ידלנה
ו. ו רב-אדם--יקרא איש חסדו ואיש אמונים מי ימצא
ז. ז מתהלך בתמו צדיק אשרי בניו אחריו
ח. ח מלך יושב על-כסא-דין-- מזרה בעיניו כל-רע
ט. ט מי-יאמר זכיתי לבי טהרתי מחטאתי
י. י אבן ואבן איפה ואיפה-- תועבת יהוה גם-שניהם
יא. יא גם במעלליו יתנכר-נער-- אם-זך ואם-ישר פעלו
יב. יב אזן שמעת ועין ראה-- יהוה עשה גם-שניהם
יג. יג אל-תאהב שנה פן-תורש פקח עיניך שבע-לחם
יד. יד רע רע יאמר הקונה ואזל לו אז יתהלל
טו. טו יש זהב ורב-פנינים וכלי יקר שפתי-דעת
טז. טז לקח-בגדו כי-ערב זר ובעד נכרים (נכריה) חבלהו
יז. יז ערב לאיש לחם שקר ואחר ימלא-פיהו חצץ
יח. יח מחשבות בעצה תכון ובתחבלות עשה מלחמה
יט. יט גולה-סוד הולך רכיל ולפתה שפתיו לא תתערב
כ. כ מקלל אביו ואמו-- ידעך נרו באישון (באשון) חשך
כא. כא נחלה מבחלת (מבהלת) בראשונה ואחריתה לא תברך
כב. כב אל-תאמר אשלמה-רע קוה ליהוה וישע לך
כג. כג תועבת יהוה אבן ואבן ומאזני מרמה לא-טוב
כד. כד מיהוה מצעדי-גבר ואדם מה-יבין דרכו
כה. כה מוקש אדם ילע קדש ואחר נדרים לבקר
כו. כו מזרה רשעים מלך חכם וישב עליהם אופן
כז. כז נר יהוה נשמת אדם חפש כל-חדרי-בטן
כח. כח חסד ואמת יצרו-מלך וסעד בחסד כסאו
כט. כט תפארת בחורים כחם והדר זקנים שיבה
ל. ל חברות פצע תמריק (תמרוק) ברע ומכות חדרי-בטן