א. א פלגי-מים לב-מלך ביד-יהוה על-כל-אשר יחפץ יטנו
ב. ב כל-דרך-איש ישר בעיניו ותכן לבות יהוה
ג. ג עשה צדקה ומשפט-- נבחר ליהוה מזבח
ד. ד רום-עינים ורחב-לב-- נר רשעים חטאת
ה. ה מחשבות חרוץ אך-למותר וכל-אץ אך-למחסור
ו. ו פעל אצרות בלשון שקר-- הבל נדף מבקשי-מות
ז. ז שד-רשעים יגורם כי מאנו לעשות משפט
ח. ח הפכפך דרך איש וזר וזך ישר פעלו
ט. ט טוב לשבת על-פנת-גג-- מאשת מדינים ובית חבר
י. י נפש רשע אותה-רע לא-יחן בעיניו רעהו
יא. יא בענש-לץ יחכם-פתי ובהשכיל לחכם יקח-דעת
יב. יב משכיל צדיק לבית רשע מסלף רשעים לרע
יג. יג אטם אזנו מזעקת-דל-- גם-הוא יקרא ולא יענה
יד. יד מתן בסתר יכפה-אף ושחד בחק חמה עזה
טו. טו שמחה לצדיק עשות משפט ומחתה לפעלי און
טז. טז אדם--תועה מדרך השכל בקהל רפאים ינוח
יז. יז איש מחסור אהב שמחה אהב יין-ושמן לא יעשיר
יח. יח כפר לצדיק רשע ותחת ישרים בוגד
יט. יט טוב שבת בארץ-מדבר-- מאשת מדונים (מדינים) וכעס
כ. כ אוצר נחמד ושמן--בנוה חכם וכסיל אדם יבלענו
כא. כא רדף צדקה וחסד-- ימצא חיים צדקה וכבוד
כב. כב עיר גברים עלה חכם וירד עז מבטחה
כג. כג שמר פיו ולשונו-- שמר מצרות נפשו
כד. כד זד יהיר לץ שמו-- עושה בעברת זדון
כה. כה תאות עצל תמיתנו כי-מאנו ידיו לעשות
כו. כו כל-היום התאוה תאוה וצדיק יתן ולא יחשך
כז. כז זבח רשעים תועבה אף כי-בזמה יביאנו
כח. כח עד-כזבים יאבד ואיש שומע לנצח ידבר
כט. כט העז איש רשע בפניו וישר הוא יכין דרכיו (יבין דרכו)
ל. ל אין חכמה ואין תבונה-- ואין עצה לנגד יהוה
לא. לא סוס--מוכן ליום מלחמה וליהוה התשועה