א. א נבחר שם מעשר רב מכסף ומזהב חן טוב
ב. ב עשיר ורש נפגשו עשה כלם יהוה
ג. ג ערום ראה רעה ויסתר (ונסתר) ופתיים עברו ונענשו
ד. ד עקב ענוה יראת יהוה עשר וכבוד וחיים
ה. ה צנים פחים בדרך עקש שומר נפשו ירחק מהם
ו. ו חנך לנער על-פי דרכו-- גם כי-יזקין לא-יסור ממנה
ז. ז עשיר ברשים ימשול ועבד לוה לאיש מלוה
ח. ח זורע עולה יקצור- (יקצר-) און ושבט עברתו יכלה
ט. ט טוב-עין הוא יברך כי-נתן מלחמו לדל
י. י גרש לץ ויצא מדון וישבת דין וקלון
יא. יא אהב טהור- (טהר-) לב-- חן שפתיו רעהו מלך
יב. יב עיני יהוה נצרו דעת ויסלף דברי בגד
יג. יג אמר עצל ארי בחוץ בתוך רחבות ארצח
יד. יד שוחה עמקה פי זרות זעום יהוה יפול- (יפל-) שם
טו. טו אולת קשורה בלב-נער שבט מוסר ירחיקנה ממנו
טז. טז עשק דל להרבות לו-- נתן לעשיר אך-למחסור
יז. יז הט אזנך--ושמע דברי חכמים ולבך תשית לדעתי
יח. יח כי-נעים כי-תשמרם בבטנך יכנו יחדו על-שפתיך
יט. יט להיות ביהוה מבטחך-- הודעתיך היום אף-אתה
כ. כ הלא כתבתי לך שלשום (שלשים)-- במעצות ודעת
כא. כא להודיעך--קשט אמרי אמת להשיב אמרים אמת לשלחיך
כב. כב אל-תגזל-דל כי דל-הוא ואל-תדכא עני בשער
כג. כג כי-יהוה יריב ריבם וקבע את-קבעיהם נפש
כד. כד אל-תתרע את-בעל אף ואת-איש חמות לא תבוא
כה. כה פן-תאלף ארחתו ולקחת מוקש לנפשך
כו. כו אל-תהי בתקעי-כף בערבים משאות
כז. כז אם-אין-לך לשלם-- למה יקח משכבך מתחתיך
כח. כח אל-תסג גבול עולם-- אשר עשו אבותיך
כט. כט חזית איש מהיר במלאכתו-- לפני-מלכים יתיצב בל-יתיצב לפני חשכים