א. א כשלג בקיץ--וכמטר בקציר כן לא-נאוה לכסיל כבוד
ב. ב כצפור לנוד כדרור לעוף-- כן קללת חנם לא (לו) תבא
ג. ג שוט לסוס מתג לחמור ושבט לגו כסילים
ד. ד אל-תען כסיל כאולתו פן-תשוה-לו גם-אתה
ה. ה ענה כסיל כאולתו פן-יהיה חכם בעיניו
ו. ו מקצה רגלים חמס שתה-- שלח דברים ביד-כסיל
ז. ז דליו שקים מפסח ומשל בפי כסילים
ח. ח כצרור אבן במרגמה-- כן-נותן לכסיל כבוד
ט. ט חוח עלה ביד-שכור ומשל בפי כסילים
י. י רב מחולל-כל ושכר כסיל ושכר עברים
יא. יא ככלב שב על-קאו-- כסיל שונה באולתו
יב. יב ראית--איש חכם בעיניו תקוה לכסיל ממנו
יג. יג אמר עצל שחל בדרך ארי בין הרחבות
יד. יד הדלת תסוב על-צירה ועצל על-מטתו
טו. טו טמן עצל ידו בצלחת נלאה להשיבה אל-פיו
טז. טז חכם עצל בעיניו-- משבעה משיבי טעם
יז. יז מחזיק באזני-כלב-- עבר מתעבר על-ריב לא-לו
יח. יח כמתלהלה הירה זקים-- חצים ומות
יט. יט כן-איש רמה את-רעהו ואמר הלא-משחק אני
כ. כ באפס עצים תכבה-אש ובאין נרגן ישתק מדון
כא. כא פחם לגחלים ועצים לאש ואיש מדונים (מדינים) לחרחר-ריב
כב. כב דברי נרגן כמתלהמים והם ירדו חדרי-בטן
כג. כג כסף סיגים מצפה על-חרש-- שפתים דלקים ולב-רע
כד. כד בשפתו ינכר שונא ובקרבו ישית מרמה
כה. כה כי-יחנן קולו אל-תאמן-בו כי שבע תועבות בלבו
כו. כו תכסה שנאה במשאון תגלה רעתו בקהל
כז. כז כרה-שחת בה יפול וגולל אבן אליו תשוב
כח. כח לשון-שקר ישנא דכיו ופה חלק יעשה מדחה