א. א אל-תתהלל ביום מחר כי לא-תדע מה-ילד יום
ב. ב יהללך זר ולא-פיך נכרי ואל-שפתיך
ג. ג כבד-אבן ונטל החול וכעס אויל כבד משניהם
ד. ד אכזריות חמה ושטף אף ומי יעמד לפני קנאה
ה. ה טובה תוכחת מגלה-- מאהבה מסתרת
ו. ו נאמנים פצעי אוהב ונעתרות נשיקות שונא
ז. ז נפש שבעה תבוס נפת ונפש רעבה כל-מר מתוק
ח. ח כצפור נודדת מן-קנה-- כן-איש נודד ממקומו
ט. ט שמן וקטרת ישמח-לב ומתק רעהו מעצת-נפש
י. י רעך ורעה (ורע) אביך אל-תעזב-- ובית אחיך אל-תבוא ביום אידך טוב שכן קרוב מאח רחוק
יא. יא חכם בני ושמח לבי ואשיבה חרפי דבר
יב. יב ערום ראה רעה נסתר פתאים עברו נענשו
יג. יג קח-בגדו כי-ערב זר ובעד נכריה חבלהו
יד. יד מברך רעהו בקול גדול--בבקר השכים קללה תחשב לו
טו. טו דלף טורד ביום סגריר ואשת מדונים (מדינים) נשתוה
טז. טז צפניה צפן-רוח ושמן ימינו יקרא
יז. יז ברזל בברזל יחד ואיש יחד פני-רעהו
יח. יח נצר תאנה יאכל פריה ושמר אדניו יכבד
יט. יט כמים הפנים לפנים-- כן לב-האדם לאדם
כ. כ שאול ואבדה לא תשבענה ועיני האדם לא תשבענה
כא. כא מצרף לכסף וכור לזהב ואיש לפי מהללו
כב. כב אם תכתוש-את-האויל במכתש בתוך הריפות-- בעלי לא-תסור מעליו אולתו
כג. כג ידע תדע פני צאנך שית לבך לעדרים
כד. כד כי לא לעולם חסן ואם-נזר לדור דור (ודור)
כה. כה גלה חציר ונראה-דשא ונאספו עשבות הרים
כו. כו כבשים ללבושך ומחיר שדה עתודים
כז. כז ודי חלב עזים--ללחמך ללחם ביתך וחיים לנערותיך