א. א איש תוכחות מקשה-ערף-- פתע ישבר ואין מרפא
ב. ב ברבות צדיקים ישמח העם ובמשל רשע יאנח עם
ג. ג איש-אהב חכמה ישמח אביו ורעה זונות יאבד-הון
ד. ד מלך--במשפט יעמיד ארץ ואיש תרומות יהרסנה
ה. ה גבר מחליק על-רעהו רשת פורש על-פעמיו
ו. ו בפשע איש רע מוקש וצדיק ירון ושמח
ז. ז ידע צדיק דין דלים רשע לא-יבין דעת
ח. ח אנשי לצון יפיחו קריה וחכמים ישיבו אף
ט. ט איש-חכם--נשפט את-איש אויל ורגז ושחק ואין נחת
י. י אנשי דמים ישנאו-תם וישרים יבקשו נפשו
יא. יא כל-רוחו יוציא כסיל וחכם באחור ישבחנה
יב. יב משל מקשיב על-דבר-שקר-- כל-משרתיו רשעים
יג. יג רש ואיש תככים נפגשו-- מאיר עיני שניהם יהוה
יד. יד מלך שופט באמת דלים-- כסאו לעד יכון
טו. טו שבט ותוכחת יתן חכמה ונער משלח מביש אמו
טז. טז ברבות רשעים ירבה-פשע וצדיקים במפלתם יראו
יז. יז יסר בנך ויניחך ויתן מעדנים לנפשך
יח. יח באין חזון יפרע עם ושמר תורה אשרהו
יט. יט בדברים לא-יוסר עבד כי-יבין ואין מענה
כ. כ חזית--איש אץ בדבריו תקוה לכסיל ממנו
כא. כא מפנק מנער עבדו ואחריתו יהיה מנון
כב. כב איש-אף יגרה מדון ובעל חמה רב-פשע
כג. כג גאות אדם תשפילנו ושפל-רוח יתמך כבוד
כד. כד חולק עם-גנב שונא נפשו אלה ישמע ולא יגיד
כה. כה חרדת אדם יתן מוקש ובוטח ביהוה ישגב
כו. כו רבים מבקשים פני-מושל ומיהוה משפט-איש
כז. כז תועבת צדיקים איש עול ותועבת רשע ישר-דרך