א. א בני תורתי אל-תשכח ומצותי יצר לבך
ב. ב כי ארך ימים ושנות חיים-- ושלום יוסיפו לך
ג. ג חסד ואמת אל-יעזבך קשרם על-גרגרותיך כתבם על-לוח לבך
ד. ד ומצא-חן ושכל-טוב-- בעיני אלהים ואדם
ה. ה בטח אל-יהוה בכל-לבך ואל-בינתך אל-תשען
ו. ו בכל-דרכיך דעהו והוא יישר ארחתיך
ז. ז אל-תהי חכם בעיניך ירא את-יהוה וסור מרע
ח. ח רפאות תהי לשרך ושקוי לעצמותיך
ט. ט כבד את-יהוה מהונך ומראשית כל-תבואתך
י. י וימלאו אסמיך שבע ותירוש יקביך יפרצו
יא. יא מוסר יהוה בני אל-תמאס ואל-תקץ בתוכחתו
יב. יב כי את אשר יאהב יהוה יוכיח וכאב את-בן ירצה
יג. יג אשרי אדם מצא חכמה ואדם יפיק תבונה
יד. יד כי טוב סחרה מסחר-כסף ומחרוץ תבואתה
טו. טו יקרה היא מפניים (מפנינים) וכל-חפציך לא ישוו-בה
טז. טז ארך ימים בימינה בשמאולה עשר וכבוד
יז. יז דרכיה דרכי-נעם וכל-נתיבותיה שלום
יח. יח עץ-חיים היא למחזיקים בה ותמכיה מאשר
יט. יט יהוה--בחכמה יסד-ארץ כונן שמים בתבונה
כ. כ בדעתו תהומות נבקעו ושחקים ירעפו-טל
כא. כא בני אל-ילזו מעיניך נצר תשיה ומזמה
כב. כב ויהיו חיים לנפשך וחן לגרגרתיך
כג. כג אז תלך לבטח דרכך ורגלך לא תגוף
כד. כד אם-תשכב לא-תפחד ושכבת וערבה שנתך
כה. כה אל-תירא מפחד פתאם ומשאת רשעים כי תבא
כו. כו כי-יהוה יהיה בכסלך ושמר רגלך מלכד
כז. כז אל-תמנע-טוב מבעליו-- בהיות לאל ידיך (ידך) לעשות
כח. כח אל-תאמר לרעיך (לרעך) לך ושוב--ומחר אתן ויש אתך
כט. כט אל-תחרש על-רעך רעה והוא-יושב לבטח אתך
ל. ל אל-תרוב (תריב) עם-אדם חנם-- אם-לא גמלך רעה
לא. לא אל-תקנא באיש חמס ואל-תבחר בכל-דרכיו
לב. לב כי תועבת יהוה נלוז ואת-ישרים סודו
לג. לג מארת יהוה בבית רשע ונוה צדיקים יברך
לד. לד אם-ללצים הוא-יליץ ולעניים (ולענוים) יתן-חן
לה. לה כבוד חכמים ינחלו וכסילים מרים קלון