א. א שמעו בנים מוסר אב והקשיבו לדעת בינה
ב. ב כי לקח טוב נתתי לכם תורתי אל-תעזבו
ג. ג כי-בן הייתי לאבי רך ויחיד לפני אמי
ד. ד וירני--ויאמר לי יתמך-דברי לבך שמר מצותי וחיה
ה. ה קנה חכמה קנה בינה אל-תשכח ואל-תט מאמרי-פי
ו. ו אל-תעזבה ותשמרך אהבה ותצרך
ז. ז ראשית חכמה קנה חכמה ובכל-קנינך קנה בינה
ח. ח סלסלה ותרוממך תכבדך כי תחבקנה
ט. ט תתן לראשך לוית-חן עטרת תפארת תמגנך
י. י שמע בני וקח אמרי וירבו לך שנות חיים
יא. יא בדרך חכמה הריתיך הדרכתיך במעגלי-ישר
יב. יב בלכתך לא-יצר צעדך ואם-תרוץ לא תכשל
יג. יג החזק במוסר אל-תרף נצרה כי-היא חייך
יד. יד בארח רשעים אל-תבא ואל-תאשר בדרך רעים
טו. טו פרעהו אל-תעבר-בו שטה מעליו ועבר
טז. טז כי לא ישנו אם-לא ירעו ונגזלה שנתם אם-לא יכשולו (יכשילו)
יז. יז כי לחמו לחם רשע ויין חמסים ישתו
יח. יח וארח צדיקים כאור נגה הולך ואור עד-נכון היום
יט. יט דרך רשעים כאפלה לא ידעו במה יכשלו
כ. כ בני לדברי הקשיבה לאמרי הט-אזנך
כא. כא אל-יליזו מעיניך שמרם בתוך לבבך
כב. כב כי-חיים הם למצאיהם ולכל-בשרו מרפא
כג. כג מכל-משמר נצר לבך כי-ממנו תוצאות חיים
כד. כד הסר ממך עקשות פה ולזות שפתים הרחק ממך
כה. כה עיניך לנכח יביטו ועפעפיך יישרו נגדך
כו. כו פלס מעגל רגלך וכל-דרכיך יכנו
כז. כז אל-תט-ימין ושמאול הסר רגלך מרע