א. א הלא-חכמה תקרא ותבונה תתן קולה
ב. ב בראש-מרמים עלי-דרך בית נתיבות נצבה
ג. ג ליד-שערים לפי-קרת מבוא פתחים תרנה
ד. ד אליכם אישים אקרא וקולי אל-בני אדם
ה. ה הבינו פתאים ערמה וכסילים הבינו לב
ו. ו שמעו כי-נגידים אדבר ומפתח שפתי מישרים
ז. ז כי-אמת יהגה חכי ותועבת שפתי רשע
ח. ח בצדק כל-אמרי-פי אין בהם נפתל ועקש
ט. ט כלם נכחים למבין וישרים למצאי דעת
י. י קחו-מוסרי ואל-כסף ודעת מחרוץ נבחר
יא. יא כי-טובה חכמה מפנינים וכל-חפצים לא ישוו-בה
יב. יב אני-חכמה שכנתי ערמה ודעת מזמות אמצא
יג. יג יראת יהוה שנאת-רע גאה וגאון ודרך רע ופי תהפכות שנאתי
יד. יד לי-עצה ותושיה אני בינה לי גבורה
טו. טו בי מלכים ימלכו ורזנים יחקקו צדק
טז. טז בי שרים ישרו ונדיבים כל-שפטי צדק
יז. יז אני אהביה (אהבי) אהב ומשחרי ימצאנני
יח. יח עשר-וכבוד אתי הון עתק וצדקה
יט. יט טוב פריי מחרוץ ומפז ותבואתי מכסף נבחר
כ. כ בארח-צדקה אהלך בתוך נתיבות משפט
כא. כא להנחיל אהבי יש ואצרתיהם אמלא
כב. כב יהוה--קנני ראשית דרכו קדם מפעליו מאז
כג. כג מעולם נסכתי מראש-- מקדמי-ארץ
כד. כד באין-תהמות חוללתי באין מעינות נכבדי-מים
כה. כה בטרם הרים הטבעו לפני גבעות חוללתי
כו. כו עד-לא עשה ארץ וחוצות וראש עפרות תבל
כז. כז בהכינו שמים שם אני בחקו חוג על-פני תהום
כח. כח באמצו שחקים ממעל בעזוז עינות תהום
כט. כט בשומו לים חקו ומים לא יעברו-פיו בחוקו מוסדי ארץ
ל. ל ואהיה אצלו אמון ואהיה שעשועים יום יום משחקת לפניו בכל-עת
לא. לא משחקת בתבל ארצו ושעשעי את-בני אדם
לב. לב ועתה בנים שמעו-לי ואשרי דרכי ישמרו
לג. לג שמעו מוסר וחכמו ואל-תפרעו
לד. לד אשרי אדם שמע-לי לשקד על-דלתתי יום יום--לשמר מזוזת פתחי
לה. לה כי מצאי מצאי (מצא) חיים ויפק רצון מיהוה
לו. לו וחטאי חמס נפשו כל-משנאי אהבו מות