א. א תפלה לעני כי-יעטף-- ולפני יהוה ישפך שיחו
ב. ב יהוה שמעה תפלתי ושועתי אליך תבוא
ג. ג אל-תסתר פניך ממני-- ביום צר-לי הטה-אלי אזנך ביום אקרא מהר ענני
ד. ד כי-כלו בעשן ימי ועצמותי כמוקד נחרו
ה. ה הוכה-כעשב ויבש לבי כי-שכחתי מאכל לחמי
ו. ו מקול אנחתי-- דבקה עצמי לבשרי
ז. ז דמיתי לקאת מדבר הייתי ככוס חרבות
ח. ח שקדתי ואהיה-- כצפור בודד על-גג
ט. ט כל-היום חרפוני אויבי מהוללי בי נשבעו
י. י כי-אפר כלחם אכלתי ושקוי בבכי מסכתי
יא. יא מפני-זעמך וקצפך-- כי נשאתני ותשליכני
יב. יב ימי כצל נטוי ואני כעשב איבש
יג. יג ואתה יהוה לעולם תשב וזכרך לדר ודר
יד. יד אתה תקום תרחם ציון כי-עת לחננה כי-בא מועד
טו. טו כי-רצו עבדיך את-אבניה ואת-עפרה יחננו
טז. טז וייראו גוים את-שם יהוה וכל-מלכי הארץ את-כבודך
יז. יז כי-בנה יהוה ציון-- נראה בכבודו
יח. יח פנה אל-תפלת הערער ולא-בזה את-תפלתם
יט. יט תכתב זאת לדור אחרון ועם נברא יהלל-יה
כ. כ כי-השקיף ממרום קדשו יהוה משמים אל-ארץ הביט
כא. כא לשמע אנקת אסיר לפתח בני תמותה
כב. כב לספר בציון שם יהוה ותהלתו בירושלם
כג. כג בהקבץ עמים יחדו וממלכות לעבד את-יהוה
כד. כד ענה בדרך כחו (כחי) קצר ימי
כה. כה אמר--אלי אל תעלני בחצי ימי בדור דורים שנותיך
כו. כו לפנים הארץ יסדת ומעשה ידיך שמים
כז. כז המה יאבדו-- ואתה תעמד וכלם כבגד יבלו כלבוש תחליפם ויחלפו
כח. כח ואתה-הוא ושנותיך לא יתמו [ (Psalms 102:29) כט בני-עבדיך ישכונו וזרעם לפניך יכון ]