א. א לדוד ברכי נפשי את-יהוה וכל-קרבי את-שם קדשו
ב. ב ברכי נפשי את-יהוה ואל-תשכחי כל-גמוליו
ג. ג הסלח לכל-עונכי הרפא לכל-תחלואיכי
ד. ד הגואל משחת חייכי המעטרכי חסד ורחמים
ה. ה המשביע בטוב עדיך תתחדש כנשר נעוריכי
ו. ו עשה צדקות יהוה ומשפטים לכל-עשוקים
ז. ז יודיע דרכיו למשה לבני ישראל עלילותיו
ח. ח רחום וחנון יהוה ארך אפים ורב-חסד
ט. ט לא-לנצח יריב ולא לעולם יטור
י. י לא כחטאינו עשה לנו ולא כעונתינו גמל עלינו
יא. יא כי כגבה שמים על-הארץ-- גבר חסדו על-יראיו
יב. יב כרחק מזרח ממערב-- הרחיק ממנו את-פשעינו
יג. יג כרחם אב על-בנים-- רחם יהוה על-יראיו
יד. יד כי-הוא ידע יצרנו זכור כי-עפר אנחנו
טו. טו אנוש כחציר ימיו כציץ השדה כן יציץ
טז. טז כי רוח עברה-בו ואיננו ולא-יכירנו עוד מקומו
יז. יז וחסד יהוה מעולם ועד-עולם-- על-יראיו וצדקתו לבני בנים
יח. יח לשמרי בריתו ולזכרי פקדיו לעשותם
יט. יט יהוה--בשמים הכין כסאו ומלכותו בכל משלה
כ. כ ברכו יהוה מלאכיו גברי כח עשי דברו לשמע בקול דברו
כא. כא ברכו יהוה כל-צבאיו-- משרתיו עשי רצונו
כב. כב ברכו יהוה כל-מעשיו-- בכל-מקמות ממשלתו ברכי נפשי את-יהוה