א. א הודו ליהוה קראו בשמו הודיעו בעמים עלילותיו
ב. ב שירו-לו זמרו-לו שיחו בכל-נפלאותיו
ג. ג התהללו בשם קדשו ישמח לב מבקשי יהוה
ד. ד דרשו יהוה ועזו בקשו פניו תמיד
ה. ה זכרו--נפלאותיו אשר-עשה מפתיו ומשפטי-פיו
ו. ו זרע אברהם עבדו בני יעקב בחיריו
ז. ז הוא יהוה אלהינו בכל-הארץ משפטיו
ח. ח זכר לעולם בריתו דבר צוה לאלף דור
ט. ט אשר כרת את-אברהם ושבועתו לישחק
י. י ויעמידה ליעקב לחק לישראל ברית עולם
יא. יא לאמר--לך אתן את-ארץ-כנען חבל נחלתכם
יב. יב בהיותם מתי מספר כמעט וגרים בה
יג. יג ויתהלכו מגוי אל-גוי מממלכה אל-עם אחר
יד. יד לא-הניח אדם לעשקם ויוכח עליהם מלכים
טו. טו אל-תגעו במשיחי ולנביאי אל-תרעו
טז. טז ויקרא רעב על-הארץ כל-מטה-לחם שבר
יז. יז שלח לפניהם איש לעבד נמכר יוסף
יח. יח ענו בכבל רגליו (רגלו) ברזל באה נפשו
יט. יט עד-עת בא-דברו-- אמרת יהוה צרפתהו
כ. כ שלח מלך ויתירהו משל עמים ויפתחהו
כא. כא שמו אדון לביתו ומשל בכל-קנינו
כב. כב לאסר שריו בנפשו וזקניו יחכם
כג. כג ויבא ישראל מצרים ויעקב גר בארץ-חם
כד. כד ויפר את-עמו מאד ויעצמהו מצריו
כה. כה הפך לבם לשנא עמו להתנכל בעבדיו
כו. כו שלח משה עבדו אהרן אשר בחר-בו
כז. כז שמו-בם דברי אתותיו ומפתים בארץ חם
כח. כח שלח חשך ויחשך ולא-מרו את-דבריו (דברו)
כט. כט הפך את-מימיהם לדם וימת את-דגתם
ל. ל שרץ ארצם צפרדעים בחדרי מלכיהם
לא. לא אמר ויבא ערב כנים בכל-גבולם
לב. לב נתן גשמיהם ברד אש להבות בארצם
לג. לג ויך גפנם ותאנתם וישבר עץ גבולם
לד. לד אמר ויבא ארבה וילק ואין מספר
לה. לה ויאכל כל-עשב בארצם ויאכל פרי אדמתם
לו. לו ויך כל-בכור בארצם ראשית לכל-אונם
לז. לז ויוציאם בכסף וזהב ואין בשבטיו כושל
לח. לח שמח מצרים בצאתם כי-נפל פחדם עליהם
לט. לט פרש ענן למסך ואש להאיר לילה
מ. מ שאל ויבא שלו ולחם שמים ישביעם
מא. מא פתח צור ויזובו מים הלכו בציות נהר
מב. מב כי-זכר את-דבר קדשו את-אברהם עבדו
מג. מג ויוצא עמו בששון ברנה את-בחיריו
מד. מד ויתן להם ארצות גוים ועמל לאמים יירשו
מה. מה בעבור ישמרו חקיו-- ותורתיו ינצרו הללו-יה