א. א הללו-יה הודו ליהוה כי-טוב-- כי לעולם חסדו
ב. ב מי--ימלל גבורות יהוה ישמיע כל-תהלתו
ג. ג אשרי שמרי משפט עשה צדקה בכל-עת
ד. ד זכרני יהוה ברצון עמך פקדני בישועתך
ה. ה לראות בטובת בחיריך-- לשמח בשמחת גויך להתהלל עם-נחלתך
ו. ו חטאנו עם-אבותינו העוינו הרשענו
ז. ז אבותינו במצרים לא-השכילו נפלאותיך-- לא זכרו את-רב חסדיך וימרו על-ים בים-סוף
ח. ח ויושיעם למען שמו-- להודיע את-גבורתו
ט. ט ויגער בים-סוף ויחרב ויוליכם בתהמות כמדבר
י. י ויושיעם מיד שונא ויגאלם מיד אויב
יא. יא ויכסו-מים צריהם אחד מהם לא נותר
יב. יב ויאמינו בדבריו ישירו תהלתו
יג. יג מהרו שכחו מעשיו לא-חכו לעצתו
יד. יד ויתאוו תאוה במדבר וינסו-אל בישימון
טו. טו ויתן להם שאלתם וישלח רזון בנפשם
טז. טז ויקנאו למשה במחנה לאהרן קדוש יהוה
יז. יז תפתח-ארץ ותבלע דתן ותכס על-עדת אבירם
יח. יח ותבער-אש בעדתם להבה תלהט רשעים
יט. יט יעשו-עגל בחרב וישתחוו למסכה
כ. כ וימירו את-כבודם בתבנית שור אכל עשב
כא. כא שכחו אל מושיעם-- עשה גדלות במצרים
כב. כב נפלאות בארץ חם נוראות על-ים-סוף
כג. כג ויאמר להשמידם לולי משה בחירו-- עמד בפרץ לפניו להשיב חמתו מהשחית
כד. כד וימאסו בארץ חמדה לא-האמינו לדברו
כה. כה וירגנו באהליהם לא שמעו בקול יהוה
כו. כו וישא ידו להם-- להפיל אותם במדבר
כז. כז ולהפיל זרעם בגוים ולזרותם בארצות
כח. כח ויצמדו לבעל פעור ויאכלו זבחי מתים
כט. כט ויכעיסו במעלליהם ותפרץ-בם מגפה
ל. ל ויעמד פינחס ויפלל ותעצר המגפה
לא. לא ותחשב לו לצדקה לדר ודר עד-עולם
לב. לב ויקציפו על-מי מריבה וירע למשה בעבורם
לג. לג כי-המרו את-רוחו ויבטא בשפתיו
לד. לד לא-השמידו את-העמים-- אשר אמר יהוה להם
לה. לה ויתערבו בגוים וילמדו מעשיהם
לו. לו ויעבדו את-עצביהם ויהיו להם למוקש
לז. לז ויזבחו את-בניהם ואת-בנותיהם-- לשדים
לח. לח וישפכו דם נקי דם-בניהם ובנותיהם-- אשר זבחו לעצבי כנען ותחנף הארץ בדמים
לט. לט ויטמאו במעשיהם ויזנו במעלליהם
מ. מ ויחר-אף יהוה בעמו ויתעב את-נחלתו
מא. מא ויתנם ביד-גוים וימשלו בהם שנאיהם
מב. מב וילחצום אויביהם ויכנעו תחת ידם
מג. מג פעמים רבות יצילם והמה ימרו בעצתם וימכו בעונם
מד. מד וירא בצר להם-- בשמעו את-רנתם
מה. מה ויזכר להם בריתו וינחם כרב חסדו
מו. מו ויתן אותם לרחמים-- לפני כל-שוביהם
מז. מז הושיענו יהוה אלהינו וקבצנו מן-הגוים להדות לשם קדשך להשתבח בתהלתך
מח. מח ברוך יהוה אלהי ישראל מן-העולם ועד העולם-- ואמר כל-העם אמן הללו-יה