א. א למה יהוה תעמד ברחוק תעלים לעתות בצרה
ב. ב בגאות רשע ידלק עני יתפשו במזמות זו חשבו
ג. ג כי-הלל רשע על-תאות נפשו ובצע ברך נאץ יהוה
ד. ד רשע--כגבה אפו בל-ידרש אין אלהים כל-מזמותיו
ה. ה יחילו דרכו בכל-עת--מרום משפטיך מנגדו כל-צורריו יפיח בהם
ו. ו אמר בלבו בל-אמוט לדר ודר אשר לא-ברע
ז. ז אלה פיהו מלא--ומרמות ותך תחת לשונו עמל ואון
ח. ח ישב במארב חצרים--במסתרים יהרג נקי עיניו לחלכה יצפנו
ט. ט יארב במסתר כאריה בסכה-- יארב לחטוף עני יחטף עני במשכו ברשתו
י. י ודכה (ידכה) ישח ונפל בעצומיו חלכאים (חל כאים)
יא. יא אמר בלבו שכח אל הסתיר פניו בל-ראה לנצח
יב. יב קומה יהוה--אל נשא ידך אל-תשכח עניים (ענוים)
יג. יג על-מה נאץ רשע אלהים אמר בלבו לא תדרש
יד. יד ראתה כי-אתה עמל וכעס תביט-- לתת בידך עליך יעזב חלכה יתום אתה היית עוזר
טו. טו שבר זרוע רשע ורע תדרוש-רשעו בל-תמצא
טז. טז יהוה מלך עולם ועד אבדו גוים מארצו
יז. יז תאות ענוים שמעת יהוה תכין לבם תקשיב אזנך
יח. יח לשפט יתום ודך בל-יוסיף עוד--לערץ אנוש מן-הארץ