א. א הללו-יה אשרי-איש ירא את-יהוה במצותיו חפץ מאד
ב. ב גבור בארץ יהיה זרעו דור ישרים יברך
ג. ג הון-ועשר בביתו וצדקתו עמדת לעד
ד. ד זרח בחשך אור לישרים חנון ורחום וצדיק
ה. ה טוב-איש חונן ומלוה יכלכל דבריו במשפט
ו. ו כי-לעולם לא-ימוט לזכר עולם יהיה צדיק
ז. ז משמועה רעה לא יירא נכון לבו בטח ביהוה
ח. ח סמוך לבו לא יירא עד אשר-יראה בצריו
ט. ט פזר נתן לאביונים-- צדקתו עמדת לעד קרנו תרום בכבוד
י. י רשע יראה וכעס-- שניו יחרק ונמס תאות רשעים תאבד