א. א לא לנו יהוה לא-לנו כי-לשמך תן כבוד--על-חסדך על-אמתך
ב. ב למה יאמרו הגוים איה-נא אלהיהם
ג. ג ואלהינו בשמים-- כל אשר-חפץ עשה
ד. ד עצביהם כסף וזהב מעשה ידי אדם
ה. ה פה-להם ולא ידברו עינים להם ולא יראו
ו. ו אזנים להם ולא ישמעו אף להם ולא יריחון
ז. ז ידיהם ולא ימישון--רגליהם ולא יהלכו לא-יהגו בגרונם
ח. ח כמוהם יהיו עשיהם-- כל אשר-בטח בהם
ט. ט ישראל בטח ביהוה עזרם ומגנם הוא
י. י בית אהרן בטחו ביהוה עזרם ומגנם הוא
יא. יא יראי יהוה בטחו ביהוה עזרם ומגנם הוא
יב. יב יהוה זכרנו יברך יברך את-בית ישראל יברך את-בית אהרן
יג. יג יברך יראי יהוה-- הקטנים עם-הגדלים
יד. יד יסף יהוה עליכם עליכם ועל בניכם
טו. טו ברוכים אתם ליהוה-- עשה שמים וארץ
טז. טז השמים שמים ליהוה והארץ נתן לבני-אדם
יז. יז לא המתים יהללו-יה ולא כל-ירדי דומה
יח. יח ואנחנו נברך יה-- מעתה ועד-עולם הללו-יה