א. א אהבתי כי-ישמע יהוה-- את-קולי תחנוני
ב. ב כי-הטה אזנו לי ובימי אקרא
ג. ג אפפוני חבלי-מות--ומצרי שאול מצאוני צרה ויגון אמצא
ד. ד ובשם-יהוה אקרא אנה יהוה מלטה נפשי
ה. ה חנון יהוה וצדיק ואלהינו מרחם
ו. ו שמר פתאים יהוה דלתי ולי יהושיע
ז. ז שובי נפשי למנוחיכי כי-יהוה גמל עליכי
ח. ח כי חלצת נפשי ממות את-עיני מן-דמעה את-רגלי מדחי
ט. ט אתהלך לפני יהוה-- בארצות החיים
י. י האמנתי כי אדבר אני עניתי מאד
יא. יא אני אמרתי בחפזי כל-האדם כזב
יב. יב מה-אשיב ליהוה-- כל-תגמולוהי עלי
יג. יג כוס-ישועות אשא ובשם יהוה אקרא
יד. יד נדרי ליהוה אשלם נגדה-נא לכל-עמו
טו. טו יקר בעיני יהוה-- המותה לחסידיו
טז. טז אנה יהוה כי-אני עבדך אני-עבדך בן-אמתך פתחת למוסרי
יז. יז לך-אזבח זבח תודה ובשם יהוה אקרא
יח. יח נדרי ליהוה אשלם נגדה-נא לכל-עמו
יט. יט בחצרות בית יהוה-- בתוככי ירושלם הללו-יה