א. א הודו ליהוה כי-טוב כי לעולם חסדו
ב. ב יאמר-נא ישראל כי לעולם חסדו
ג. ג יאמרו-נא בית-אהרן כי לעולם חסדו
ד. ד יאמרו-נא יראי יהוה כי לעולם חסדו
ה. ה מן-המצר קראתי יה ענני במרחב יה
ו. ו יהוה לי לא אירא מה-יעשה לי אדם
ז. ז יהוה לי בעזרי ואני אראה בשנאי
ח. ח טוב לחסות ביהוה-- מבטח באדם
ט. ט טוב לחסות ביהוה-- מבטח בנדיבים
י. י כל-גוים סבבוני בשם יהוה כי אמילם
יא. יא סבוני גם-סבבוני בשם יהוה כי אמילם
יב. יב סבוני כדבורים-- דעכו כאש קוצים בשם יהוה כי אמילם
יג. יג דחה דחיתני לנפל ויהוה עזרני
יד. יד עזי וזמרת יה ויהי-לי לישועה
טו. טו קול רנה וישועה--באהלי צדיקים ימין יהוה עשה חיל
טז. טז ימין יהוה רוממה ימין יהוה עשה חיל
יז. יז לא-אמות כי-אחיה ואספר מעשי יה
יח. יח יסר יסרני יה ולמות לא נתנני
יט. יט פתחו-לי שערי-צדק אבא-בם אודה יה
כ. כ זה-השער ליהוה צדיקים יבאו בו
כא. כא אודך כי עניתני ותהי-לי לישועה
כב. כב אבן מאסו הבונים-- היתה לראש פנה
כג. כג מאת יהוה היתה זאת היא נפלאת בעינינו
כד. כד זה-היום עשה יהוה נגילה ונשמחה בו
כה. כה אנא יהוה הושיעה נא אנא יהוה הצליחה נא
כו. כו ברוך הבא בשם יהוה ברכנוכם מבית יהוה
כז. כז אל יהוה--ויאר-לנו אסרו-חג בעבתים--עד קרנות המזבח
כח. כח אלי אתה ואודך אלהי ארוממך
כט. כט הודו ליהוה כי-טוב כי לעולם חסדו