א. א הללו-יה הללו את-שם יהוה הללו עבדי יהוה
ב. ב שעמדים בבית יהוה-- בחצרות בית אלהינו
ג. ג הללו-יה כי-טוב יהוה זמרו לשמו כי נעים
ד. ד כי-יעקב בחר לו יה ישראל לסגלתו
ה. ה כי אני ידעתי כי-גדול יהוה ואדנינו מכל-אלהים
ו. ו כל אשר-חפץ יהוה עשה בשמים ובארץ-- בימים וכל-תהמות
ז. ז מעלה נשאים מקצה הארץ ברקים למטר עשה מוצא-רוח מאוצרותיו
ח. ח שהכה בכורי מצרים-- מאדם עד-בהמה
ט. ט שלח אותת ומפתים--בתוככי מצרים בפרעה ובכל-עבדיו
י. י שהכה גוים רבים והרג מלכים עצומים
יא. יא לסיחון מלך האמרי ולעוג מלך הבשן ולכל ממלכות כנען
יב. יב ונתן ארצם נחלה-- נחלה לישראל עמו
יג. יג יהוה שמך לעולם יהוה זכרך לדר-ודר
יד. יד כי-ידין יהוה עמו ועל-עבדיו יתנחם
טו. טו עצבי הגוים כסף וזהב מעשה ידי אדם
טז. טז פה-להם ולא ידברו עינים להם ולא יראו
יז. יז אזנים להם ולא יאזינו אף אין-יש-רוח בפיהם
יח. יח כמוהם יהיו עשיהם-- כל אשר-בטח בהם
יט. יט בית ישראל ברכו את-יהוה בית אהרן ברכו את-יהוה
כ. כ בית הלוי ברכו את-יהוה יראי יהוה ברכו את-יהוה
כא. כא ברוך יהוה מציון-- שכן ירושלם הללו-יה