א. א לדוד ברוך יהוה צורי-- המלמד ידי לקרב אצבעותי למלחמה
ב. ב חסדי ומצודתי משגבי ומפלטי-לי מגני ובו חסיתי הרודד עמי תחתי
ג. ג יהוה--מה-אדם ותדעהו בן-אנוש ותחשבהו
ד. ד אדם להבל דמה ימיו כצל עובר
ה. ה יהוה הט-שמיך ותרד גע בהרים ויעשנו
ו. ו ברוק ברק ותפיצם שלח חציך ותהמם
ז. ז שלח ידיך ממרום פצני והצילני ממים רבים מיד בני נכר
ח. ח אשר פיהם דבר-שוא וימינם ימין שקר
ט. ט אלהים--שיר חדש אשירה לך בנבל עשור אזמרה-לך
י. י הנותן תשועה למלכים הפוצה את-דוד עבדו--מחרב רעה
יא. יא פצני והצילני מיד בני-נכר אשר פיהם דבר-שוא וימינם ימין שקר
יב. יב אשר בנינו כנטעים-- מגדלים בנעוריהם בנותינו כזוית-- מחטבות תבנית היכל
יג. יג מזוינו מלאים-- מפיקים מזן אל-זן צאוננו מאליפות מרבבות-- בחוצותינו
יד. יד אלופינו מסבלים אין-פרץ ואין יוצאת ואין צוחה ברחבתינו
טו. טו אשרי העם שככה לו אשרי העם שיהוה אלהיו