א. א הללו-יה כי-טוב זמרה אלהינו-- כי-נעים נאוה תהלה
ב. ב בונה ירושלם יהוה נדחי ישראל יכנס
ג. ג הרפא לשבורי לב ומחבש לעצבותם
ד. ד מונה מספר לכוכבים לכלם שמות יקרא
ה. ה גדול אדונינו ורב-כח לתבונתו אין מספר
ו. ו מעודד ענוים יהוה משפיל רשעים עדי-ארץ
ז. ז ענו ליהוה בתודה זמרו לאלהינו בכנור
ח. ח המכסה שמים בעבים-- המכין לארץ מטר המצמיח הרים חציר
ט. ט נותן לבהמה לחמה לבני ערב אשר יקראו
י. י לא בגבורת הסוס יחפץ לא-בשוקי האיש ירצה
יא. יא רוצה יהוה את-יראיו-- את-המיחלים לחסדו
יב. יב שבחי ירושלם את-יהוה הללי אלהיך ציון
יג. יג כי-חזק בריחי שעריך ברך בניך בקרבך
יד. יד השם-גבולך שלום חלב חטים ישביעך
טו. טו השלח אמרתו ארץ עד-מהרה ירוץ דברו
טז. טז הנתן שלג כצמר כפור כאפר יפזר
יז. יז משליך קרחו כפתים לפני קרתו מי יעמד
יח. יח ישלח דברו וימסם ישב רוחו יזלו-מים
יט. יט מגיד דברו ליעקב חקיו ומשפטיו לישראל
כ. כ לא עשה כן לכל-גוי-- ומשפטים בל-ידעום הללו-יה