א. א הללו-יה הללו את-יהוה מן-השמים הללוהו במרומים
ב. ב הללוהו כל-מלאכיו הללוהו כל-צבאו
ג. ג הללוהו שמש וירח הללוהו כל-כוכבי אור
ד. ד הללוהו שמי השמים והמים אשר מעל השמים
ה. ה יהללו את-שם יהוה כי הוא צוה ונבראו
ו. ו ויעמידם לעד לעולם חק-נתן ולא יעבור
ז. ז הללו את-יהוה מן-הארץ-- תנינים וכל-תהמות
ח. ח אש וברד שלג וקיטור רוח סערה עשה דברו
ט. ט ההרים וכל-גבעות עץ פרי וכל-ארזים
י. י החיה וכל-בהמה רמש וצפור כנף
יא. יא מלכי-ארץ וכל-לאמים שרים וכל-שפטי ארץ
יב. יב בחורים וגם-בתולות זקנים עם-נערים
יג. יג יהללו את-שם יהוה-- כי-נשגב שמו לבדו הודו על-ארץ ושמים
יד. יד וירם קרן לעמו תהלה לכל-חסידיו-- לבני ישראל עם קרבו הללו-יה