א. א מכתם לדוד שמרני אל כי-חסיתי בך
ב. ב אמרת ליהוה אדני אתה טובתי בל-עליך
ג. ג לקדושים אשר-בארץ המה ואדירי כל-חפצי-בם
ד. ד ירבו עצבותם אחר מהרו בל-אסיך נסכיהם מדם ובל-אשא את-שמותם על-שפתי
ה. ה יהוה מנת-חלקי וכוסי-- אתה תומיך גורלי
ו. ו חבלים נפלו-לי בנעמים אף-נחלת שפרה עלי
ז. ז אברך--את-יהוה אשר יעצני אף-לילות יסרוני כליותי
ח. ח שויתי יהוה לנגדי תמיד כי מימיני בל-אמוט
ט. ט לכן שמח לבי--ויגל כבודי אף-בשרי ישכן לבטח
י. י כי לא-תעזב נפשי לשאול לא-תתן חסידך לראות שחת
יא. יא תודיעני ארח חיים שבע שמחות את-פניך נעמות בימינך נצח