א. א תפלה לדוד שמעה יהוה צדק-- הקשיבה רנתי האזינה תפלתי בלא שפתי מרמה
ב. ב מלפניך משפטי יצא עיניך תחזינה מישרים
ג. ג בחנת לבי פקדת לילה-- צרפתני בל-תמצא זמתי בל-יעבר-פי
ד. ד לפעלות אדם בדבר שפתיך-- אני שמרתי ארחות פריץ
ה. ה תמך אשרי במעגלותיך בל-נמוטו פעמי
ו. ו אני-קראתיך כי-תענני אל הט-אזנך לי שמע אמרתי
ז. ז הפלה חסדיך מושיע חוסים-- ממתקוממים בימינך
ח. ח שמרני כאישון בת-עין בצל כנפיך תסתירני
ט. ט מפני רשעים זו שדוני איבי בנפש יקיפו עלי
י. י חלבמו סגרו פימו דברו בגאות
יא. יא אשרינו עתה סבבוני (סבבונו) עיניהם ישיתו לנטות בארץ
יב. יב דמינו--כאריה יכסוף לטרף וככפיר ישב במסתרים
יג. יג קומה יהוה-- קדמה פניו הכריעהו פלטה נפשי מרשע חרבך
יד. יד ממתים ידך יהוה ממתים מחלד-- חלקם בחיים וצפינך (וצפונך) תמלא בטנם ישבעו בנים-- והניחו יתרם לעולליהם
טו. טו אני--בצדק אחזה פניך אשבעה בהקיץ תמונתך