ב. ב השמים מספרים כבוד-אל ומעשה ידיו מגיד הרקיע
ג. ג יום ליום יביע אמר ולילה ללילה יחוה-דעת
ד. ד אין-אמר ואין דברים בלי נשמע קולם
ה. ה בכל-הארץ יצא קום ובקצה תבל מליהם לשמש שם-אהל בהם
ו. ו והוא--כחתן יצא מחפתו ישיש כגבור לרוץ ארח
ז. ז מקצה השמים מוצאו--ותקופתו על-קצותם ואין נסתר מחמתו
ח. ח תורת יהוה תמימה משיבת נפש עדות יהוה נאמנה מחכימת פתי
ט. ט פקודי יהוה ישרים משמחי-לב מצות יהוה ברה מאירת עינים
י. י יראת יהוה טהורה--עומדת לעד משפטי-יהוה אמת צדקו יחדו
יא. יא הנחמדים--מזהב ומפז רב ומתוקים מדבש ונפת צופים
יב. יב גם-עבדך נזהר בהם בשמרם עקב רב
יג. יג שגיאות מי-יבין מנסתרות נקני
יד. יד גם מזדים חשך עבדך-- אל-ימשלו-בי אז איתם ונקיתי מפשע רב [ (Psalms 19:15) טו יהיו לרצון אמרי-פי והגיון לבי לפניך יהוה צורי וגאלי ]