א. א למנצח על-אילת השחר מזמור לדוד
ב. ב אלי אלי למה עזבתני רחוק מישועתי דברי שאגתי
ג. ג אלהי--אקרא יומם ולא תענה ולילה ולא-דמיה לי
ד. ד ואתה קדוש-- יושב תהלות ישראל
ה. ה בך בטחו אבתינו בטחו ותפלטמו
ו. ו אליך זעקו ונמלטו בך בטחו ולא-בושו
ז. ז ואנכי תולעת ולא-איש חרפת אדם ובזוי עם
ח. ח כל-ראי ילעגו לי יפטירו בשפה יניעו ראש
ט. ט גל אל-יהוה יפלטהו יצילהו כי חפץ בו
י. י כי-אתה גחי מבטן מבטיחי על-שדי אמי
יא. יא עליך השלכתי מרחם מבטן אמי אלי אתה
יב. יב אל-תרחק ממני כי-צרה קרובה כי-אין עוזר
יג. יג סבבוני פרים רבים אבירי בשן כתרוני
יד. יד פצו עלי פיהם אריה טרף ושאג
טו. טו כמים נשפכתי-- והתפרדו כל-עצמותי היה לבי כדונג נמס בתוך מעי
טז. טז יבש כחרש כחי ולשוני מדבק מלקוחי ולעפר-מות תשפתני
יז. יז כי סבבוני כלבים עדת מרעים הקיפוני כארי ידי ורגלי
יח. יח אספר כל-עצמותי המה יביטו יראו-בי
יט. יט יחלקו בגדי להם ועל-לבושי יפילו גורל
כ. כ ואתה יהוה אל-תרחק אילותי לעזרתי חושה
כא. כא הצילה מחרב נפשי מיד-כלב יחידתי
כב. כב הושיעני מפי אריה ומקרני רמים עניתני
כג. כג אספרה שמך לאחי בתוך קהל אהללך
כד. כד יראי יהוה הללוהו-- כל-זרע יעקב כבדוהו וגורו ממנו כל-זרע ישראל
כה. כה כי לא-בזה ולא שקץ ענות עני-- ולא-הסתיר פניו ממנו ובשועו אליו שמע
כו. כו מאתך תהלתי בקהל רב--נדרי אשלם נגד יראיו
כז. כז יאכלו ענוים וישבעו-- יהללו יהוה דרשיו יחי לבבכם לעד
כח. כח יזכרו וישבו אל-יהוה-- כל-אפסי-ארץ וישתחוו לפניך כל-משפחות גוים
כט. כט כי ליהוה המלוכה ומשל בגוים
ל. ל אכלו וישתחוו כל-דשני-ארץ-- לפניו יכרעו כל-יורדי עפר ונפשו לא חיה
לא. לא זרע יעבדנו יספר לאדני לדור [ (Psalms 22:32) לב יבאו ויגידו צדקתו לעם נולד כי עשה ]