א. א לדוד מזמור ליהוה הארץ ומלואה תבל וישבי בה
ב. ב כי-הוא על-ימים יסדה ועל-נהרות יכוננה
ג. ג מי-יעלה בהר-יהוה ומי-יקום במקום קדשו
ד. ד נקי כפים ובר-לבב אשר לא-נשא לשוא נפשי ולא נשבע למרמה
ה. ה ישא ברכה מאת יהוה וצדקה מאלהי ישעו
ו. ו זה דור דרשו מבקשי פניך יעקב סלה
ז. ז שאו שערים ראשיכם והנשאו פתחי עולם ויבוא מלך הכבוד
ח. ח מי זה מלך הכבוד יהוה עזוז וגבור יהוה גבור מלחמה
ט. ט שאו שערים ראשיכם ושאו פתחי עולם ויבא מלך הכבוד
י. י מי הוא זה מלך הכבוד יהוה צבאות-- הוא מלך הכבוד סלה