א. א לדוד יהוה אורי וישעי--ממי אירא יהוה מעוז-חיי ממי אפחד
ב. ב בקרב עלי מרעים-- לאכל את-בשרי צרי ואיבי לי המה כשלו ונפלו
ג. ג אם-תחנה עלי מחנה-- לא-יירא לבי אם-תקום עלי מלחמה-- בזאת אני בוטח
ד. ד אחת שאלתי מאת-יהוה-- אותה אבקש שבתי בבית-יהוה כל-ימי חיי לחזות בנעם-יהוה ולבקר בהיכלו
ה. ה כי יצפנני בסכה-- ביום רעה יסתרני בסתר אהלו בצור ירוממני
ו. ו ועתה ירום ראשי על איבי סביבותי ואזבחה באהלו זבחי תרועה אשירה ואזמרה ליהוה
ז. ז שמע-יהוה קולי אקרא וחנני וענני
ח. ח לך אמר לבי--בקשו פני את-פניך יהוה אבקש
ט. ט אל-תסתר פניך ממני-- אל תט-באף עבדך עזרתי היית אל-תטשני ואל-תעזבני אלהי ישעי
י. י כי-אבי ואמי עזבוני ויהוה יאספני
יא. יא הורני יהוה דרכך ונחני בארח מישור--למען שוררי
יב. יב אל-תתנני בנפש צרי כי קמו-בי עדי-שקר ויפח חמס
יג. יג לולא--האמנתי לראות בטוב-יהוה בארץ חיים
יד. יד קוה אל-יהוה חזק ויאמץ לבך וקוה אל-יהוה