א. א לדוד אליך יהוה אקרא-- צורי אל-תחרש ממני פן-תחשה ממני ונמשלתי עם-יורדי בור
ב. ב שמע קול תחנוני בשועי אליך בנשאי ידי אל-דביר קדשך
ג. ג אל-תמשכני עם-רשעים ועם-פעלי-און דברי שלום עם-רעיהם ורעה בלבבם
ד. ד תן-להם כפעלם וכרע מעלליהם כמעשה ידיהם תן להם השב גמולם להם
ה. ה כי לא יבינו אל-פעלת יהוה-- ואל-מעשה ידיו יהרסם ולא יבנם
ו. ו ברוך יהוה כי-שמע קול תחנוני
ז. ז יהוה עזי ומגני-- בו בטח לבי ונעזרתי ויעלז לבי ומשירי אהודנו
ח. ח יהוה עז-למו ומעוז ישועות משיחו הוא
ט. ט הושיעה את-עמך-- וברך את-נחלתך ורעם ונשאם עד-העולם