א. א מזמור לדוד הבו ליהוה בני אלים הבו ליהוה כבוד ועז
ב. ב הבו ליהוה כבוד שמו השתחוו ליהוה בהדרת-קדש
ג. ג קול יהוה על-המים אל-הכבוד הרעים יהוה על-מים רבים
ד. ד קול-יהוה בכח קול יהוה בהדר
ה. ה קול יהוה שבר ארזים וישבר יהוה את-ארזי הלבנון
ו. ו וירקידם כמו-עגל לבנון ושרין כמו בן-ראמים
ז. ז קול-יהוה חצב להבות אש
ח. ח קול יהוה יחיל מדבר יחיל יהוה מדבר קדש
ט. ט קול יהוה יחולל אילות-- ויחשף יערות ובהיכלו-- כלו אמר כבוד
י. י יהוה למבול ישב וישב יהוה מלך לעולם
יא. יא יהוה--עז לעמו יתן יהוה יברך את-עמו בשלום