א. א למה רגשו גוים ולאמים יהגו-ריק
ב. ב יתיצבו מלכי-ארץ-- ורוזנים נוסדו-יחד על-יהוה ועל-משיחו
ג. ג ננתקה את-מוסרותימו ונשליכה ממנו עבתימו
ד. ד יושב בשמים ישחק אדני ילעג-למו
ה. ה אז ידבר אלימו באפו ובחרונו יבהלמו
ו. ו ואני נסכתי מלכי על-ציון הר-קדשי
ז. ז אספרה אל-חק יהוה אמר אלי בני אתה--אני היום ילדתיך
ח. ח שאל ממני--ואתנה גוים נחלתך ואחזתך אפסי-ארץ
ט. ט תרעם בשבט ברזל ככלי יוצר תנפצם
י. י ועתה מלכים השכילו הוסרו שפטי ארץ
יא. יא עבדו את-יהוה ביראה וגילו ברעדה
יב. יב נשקו-בר פן-יאנף ותאבדו דרך-- כי-יבער כמעט אפו אשרי כל-חוסי בו