א. א לדוד משכיל אשרי נשוי-פשע כסוי חטאה
ב. ב אשרי אדם--לא יחשב יהוה לו עון ואין ברוחו רמיה
ג. ג כי-החרשתי בלו עצמי-- בשאגתי כל-היום
ד. ד כי יומם ולילה-- תכבד עלי ידך נהפך לשדי-- בחרבני קיץ סלה
ה. ה חטאתי אודיעך ועוני לא-כסיתי-- אמרתי אודה עלי פשעי ליהוה ואתה נשאת עון חטאתי סלה
ו. ו על-זאת יתפלל כל-חסיד אליך-- לעת מצא רק לשטף מים רבים-- אליו לא יגיעו
ז. ז אתה סתר לי-- מצר תצרני רני פלט תסובבני סלה
ח. ח אשכילך ואורך--בדרך-זו תלך איעצה עליך עיני
ט. ט אל-תהיו כסוס כפרד-- אין הבין במתג-ורסן עדיו לבלום בל קרב אליך
י. י רבים מכאובים לרשע והבוטח ביהוה--חסד יסובבנו
יא. יא שמחו ביהוה וגילו צדיקים והרנינו כל-ישרי-לב