א. א למנצח לעבד-יהוה לדוד
ב. ב נאם-פשע לרשע בקרב לבי אין-פחד אלהים לנגד עיניו
ג. ג כי-החליק אליו בעיניו למצא עונו לשנא
ד. ד דברי-פיו און ומרמה חדל להשכיל להיטיב
ה. ה און יחשב--על-משכבו יתיצב על-דרך לא-טוב רע לא ימאס
ו. ו יהוה בהשמים חסדך אמונתך עד-שחקים
ז. ז צדקתך כהררי-אל--משפטיך תהום רבה אדם ובהמה תושיע יהוה
ח. ח מה-יקר חסדך אלהים ובני אדם--בצל כנפיך יחסיון
ט. ט ירוין מדשן ביתך ונחל עדניך תשקם
י. י כי-עמך מקור חיים באורך נראה-אור
יא. יא משך חסדך לידעיך וצדקתך לישרי-לב
יב. יב אל-תבואני רגל גאוה ויד-רשעים אל-תנדני [ (Psalms 36:13) יג שם נפלו פעלי און דחו ולא-יכלו קום ]