א. א למנצח משכיל לבני-קרח
ב. ב כאיל תערג על-אפיקי-מים-- כן נפשי תערג אליך אלהים
ג. ג צמאה נפשי לאלהים-- לאל חי מתי אבוא ואראה פני אלהים
ד. ד היתה-לי דמעתי לחם יומם ולילה באמר אלי כל-היום איה אלהיך
ה. ה אלה אזכרה ואשפכה עלי נפשי-- כי אעבר בסך אדדם עד-בית אלהים בקול-רנה ותודה המון חוגג
ו. ו מה-תשתוחחי נפשי-- ותהמי עלי הוחלי לאלהים כי-עוד אודנו-- ישועות פניו
ז. ז אלהי-- עלי נפשי תשתוחח על-כן--אזכרך מארץ ירדן וחרמונים מהר מצער
ח. ח תהום-אל-תהום קורא לקול צנוריך כל-משבריך וגליך עלי עברו
ט. ט יומם יצוה יהוה חסדו ובלילה שירה עמי-- תפלה לאל חיי
י. י אומרה לאל סלעי-- למה שכחתני למה-קדר אלך-- בלחץ אויב
יא. יא ברצח בעצמותי-- חרפוני צוררי באמרם אלי כל-היום איה אלהיך [ (Psalms 42:12) יב מה-תשתוחחי נפשי-- ומה-תהמי עלי הוחילי לאלהים כי-עוד אודנו-- ישועת פני ואלהי ]