א. א למנצח על-ששנים לבני-קרח משכיל שיר ידידת
ב. ב רחש לבי דבר טוב-- אמר אני מעשי למלך לשוני עט סופר מהיר
ג. ג יפיפית מבני אדם-- הוצק חן בשפתותיך על-כן ברכך אלהים לעולם
ד. ד חגור-חרבך על-ירך גבור-- הודך והדרך
ה. ה והדרך צלח רכב-- על-דבר-אמת וענוה-צדק ותורך נוראות ימינך
ו. ו חציך שנונים עמים תחתיך יפלו בלב אויבי המלך
ז. ז כסאך אלהים עולם ועד שבט מישר שבט מלכותך
ח. ח אהבת צדק ותשנא-רשע על-כן משחך אלהים אלהיך שמן ששון-- מחברך
ט. ט מר-ואהלות קציעות כל-בגדתיך מן-היכלי שן מני שמחוך
י. י בנות מלכים ביקרותיך נצבה שגל לימינך בכתם אופיר
יא. יא שמעי-בת וראי והטי אזנך ושכחי עמך ובית אביך
יב. יב ויתאו המלך יפיך כי-הוא אדניך והשתחוי-לו
יג. יג ובת-צר במנחה פניך יחלו--עשירי עם
יד. יד כל-כבודה בת-מלך פנימה ממשבצות זהב לבושה
טו. טו לרקמות תובל למלך בתולות אחריה רעותיה--מובאות לך
טז. טז תובלנה בשמחת וגיל תבאינה בהיכל מלך
יז. יז תחת אבתיך יהיו בניך תשיתמו לשרים בכל-הארץ [ (Psalms 45:18) יח אזכירה שמך בכל-דר ודר על-כן עמים יהודוך לעלם ועד ]