א. א למנצח לבני-קרח מזמור
ב. ב שמעו-זאת כל-העמים האזינו כל-ישבי חלד
ג. ג גם-בני אדם גם-בני-איש-- יחד עשיר ואביון
ד. ד פי ידבר חכמות והגות לבי תבונות
ה. ה אטה למשל אזני אפתח בכנור חידתי
ו. ו למה אירא בימי רע-- עון עקבי יסובני
ז. ז הבטחים על-חילם וברב עשרם יתהללו
ח. ח אח--לא פדה יפדה איש לא-יתן לאלהים כפרו
ט. ט ויקר פדיון נפשם וחדל לעולם
י. י ויחי-עוד לנצח לא יראה השחת
יא. יא כי יראה חכמים ימותו-- יחד כסיל ובער יאבדו ועזבו לאחרים חילם
יב. יב קרבם בתימו לעולם-- משכנתם לדור ודר קראו בשמותם עלי אדמות
יג. יג ואדם ביקר בל-ילין נמשל כבהמות נדמו
יד. יד זה דרכם כסל למו ואחריהם בפיהם ירצו סלה
טו. טו כצאן לשאול שתו-- מות ירעם וירדו בם ישרים לבקר--וצירם (וצורם) לבלות שאול מזבל לו
טז. טז אך-אלהים--יפדה נפשי מיד-שאול כי יקחני סלה
יז. יז אל-תירא כי-יעשר איש כי-ירבה כבוד ביתו
יח. יח כי לא במותו יקח הכל לא-ירד אחריו כבודו
יט. יט כי-נפשו בחייו יברך ויודך כי-תיטיב לך
כ. כ תבוא עד-דור אבותיו עד-נצח לא יראו-אור [ (Psalms 49:21) כא אדם ביקר ולא יבין נמשל כבהמות נדמו ]