א. א למנצח על-יונת אלם רחקים-- לדוד מכתם באחז אותו פלשתים בגת
ב. ב חנני אלהים כי-שאפני אנוש כל-היום לחם ילחצני
ג. ג שאפו שוררי כל-היום כי-רבים לחמים לי מרום
ד. ד יום אירא-- אני אליך אבטח
ה. ה באלהים אהלל דברו באלהים בטחתי לא אירא מה-יעשה בשר לי
ו. ו כל-היום דברי יעצבו עלי כל-מחשבתם לרע
ז. ז יגורו יצפינו (יצפונו)--המה עקבי ישמרו כאשר קוו נפשי
ח. ח על-און פלט-למו באף עמים הורד אלהים
ט. ט נדי ספרתה-אתה שימה דמעתי בנאדך הלא בספרתך
י. י אז ישובו אויבי אחור ביום אקרא זה-ידעתי כי-אלהים לי
יא. יא באלהים אהלל דבר ביהוה אהלל דבר
יב. יב באלהים בטחתי לא אירא מה-יעשה אדם לי
יג. יג עלי אלהים נדריך אשלם תודת לך [ (Psalms 56:14) יד כי הצלת נפשי ממות-- הלא רגלי מדחי להתהלך לפני אלהים-- באור החיים ]