א. א למנצח אל-תשחת לדוד מכתם-- בברחו מפני-שאול במערה
ב. ב חנני אלהים חנני-- כי בך חסיה נפשי ובצל-כנפיך אחסה-- עד יעבר הוות
ג. ג אקרא לאלהים עליון לאל גמר עלי
ד. ד ישלח משמים ויושיעני-- חרף שאפי סלה ישלח אלהים חסדו ואמתו
ה. ה נפשי בתוך לבאם-- אשכבה להטים בני-אדם--שניהם חנית וחצים ולשונם חרב חדה
ו. ו רומה על-השמים אלהים על כל-הארץ כבודך
ז. ז רשת הכינו לפעמי-- כפף נפשי כרו לפני שיחה נפלו בתוכה סלה
ח. ח נכון לבי אלהים נכון לבי אשירה ואזמרה
ט. ט עורה כבודי--עורה הנבל וכנור אעירה שחר
י. י אודך בעמים אדני אזמרך בלאמים
יא. יא כי-גדל עד-שמים חסדך ועד-שחקים אמתך [ (Psalms 57:12) יב רומה על-שמים אלהים על כל-הארץ כבודך ]