א. א למנצח אל-תשחת לדוד מכתם בשלח שאול וישמרו את-הבית להמיתו
ב. ב הצילני מאיבי אלהי ממתקוממי תשגבני
ג. ג הצילני מפעלי און ומאנשי דמים הושיעני
ד. ד כי הנה ארבו לנפשי-- יגורו עלי עזים לא-פשעי ולא-חטאתי יהוה
ה. ה בלי-עון ירצון ויכוננו עורה לקראתי וראה
ו. ו ואתה יהוה-אלהים צבאות אלהי ישראל-- הקיצה לפקד כל-הגוים אל-תחן כל-בגדי און סלה
ז. ז ישובו לערב יהמו ככלב ויסובבו עיר
ח. ח הנה יביעון בפיהם--חרבות בשפתותיהם כי-מי שמע
ט. ט ואתה יהוה תשחק-למו תלעג לכל-גוים
י. י עזו אליך אשמרה כי-אלהים משגבי
יא. יא אלהי חסדו (חסדי) יקדמני אלהים יראני בשררי
יב. יב אל-תהרגם פן ישכחו עמי--הניעמו בחילך והורידמו מגננו אדני
יג. יג חטאת-פימו דבר-שפתימו וילכדו בגאונם ומאלה ומכחש יספרו
יד. יד כלה בחמה כלה ואינמו וידעו--כי-אלהים משל ביעקב לאפסי הארץ סלה
טו. טו וישבו לערב יהמו ככלב ויסובבו עיר
טז. טז המה ינועון (יניעון) לאכל-- אם-לא ישבעו וילינו
יז. יז ואני אשיר עזך-- וארנן לבקר חסדך כי-היית משגב לי ומנוס ביום צר-לי [ (Psalms 59:18) יח עזי אליך אזמרה כי-אלהים משגבי אלהי חסדי ]