א. א לשלמה אלהים--משפטיך למלך תן וצדקתך לבן-מלך
ב. ב ידין עמך בצדק וענייך במשפט
ג. ג ישאו הרים שלום לעם וגבעות בצדקה
ד. ד ישפט עניי-עם--יושיע לבני אביון וידכא עושק
ה. ה ייראוך עם-שמש ולפני ירח דור דורים
ו. ו ירד כמטר על-גז כרביבים זרזיף ארץ
ז. ז יפרח-בימיו צדיק ורב שלום עד-בלי ירח
ח. ח וירד מים עד-ים ומנהר עד-אפסי-ארץ
ט. ט לפניו יכרעו ציים ואיביו עפר ילחכו
י. י מלכי תרשיש ואיים מנחה ישיבו מלכי שבא וסבא אשכר יקריבו
יא. יא וישתחוו-לו כל-מלכים כל-גוים יעבדוהו
יב. יב כי-יציל אביון משוע ועני ואין-עזר לו
יג. יג יחס על-דל ואביון ונפשות אביונים יושיע
יד. יד מתוך ומחמס יגאל נפשם וייקר דמם בעיניו
טו. טו ויחי-- ויתן-לו מזהב שבא ויתפלל בעדו תמיד כל-היום יברכנהו
טז. טז יהי פסת-בר בארץ-- בראש הרים ירעש כלבנון פריו ויציצו מעיר כעשב הארץ
יז. יז יהי שמו לעולם-- לפני-שמש ינין (ינון) שמו ויתברכו בו כל-גוים יאשרוהו
יח. יח ברוך יהוה אלהים--אלהי ישראל עשה נפלאות לבדו
יט. יט וברוך שם כבודו-- לעולם וימלא כבודו את-כל הארץ-- אמן ואמן
כ. כ כלו תפלות-- דוד בן-ישי