א. א למנצח על-ידיתון (ידותון) לאסף מזמור
ב. ב קולי אל-אלהים ואצעקה קולי אל-אלהים והאזין אלי
ג. ג ביום צרתי אדני דרשתי ידי לילה נגרה--ולא תפוג מאנה הנחם נפשי
ד. ד אזכרה אלהים ואהמיה אשיחה ותתעטף רוחי סלה
ה. ה אחזת שמרות עיני נפעמתי ולא אדבר
ו. ו חשבתי ימים מקדם-- שנות עולמים
ז. ז אזכרה נגינתי בלילה עם-לבבי אשיחה ויחפש רוחי
ח. ח הלעולמים יזנח אדני ולא-יסיף לרצות עוד
ט. ט האפס לנצח חסדו גמר אמר לדר ודר
י. י השכח חנות אל אם-קפץ באף רחמיו סלה
יא. יא ואמר חלותי היא-- שנות ימין עליון
יב. יב אזכיר (אזכור) מעללי-יה כי-אזכרה מקדם פלאך
יג. יג והגיתי בכל-פעלך ובעלילותיך אשיחה
יד. יד אלהים בקדש דרכך מי-אל גדול כאלהים
טו. טו אתה האל עשה פלא הודעת בעמים עזך
טז. טז גאלת בזרוע עמך בני-יעקב ויוסף סלה
יז. יז ראוך מים אלהים--ראוך מים יחילו אף ירגזו תהמות
יח. יח זרמו מים עבות--קול נתנו שחקים אף-חצציך יתהלכו
יט. יט קול רעמך בגלגל--האירו ברקים תבל רגזה ותרעש הארץ
כ. כ בים דרכך--ושביליך (ושבילך) במים רבים ועקבותיך לא נדעו [ (Psalms 77:21) כא נחית כצאן עמך-- ביד-משה ואהרן ]