ב. ב הרנינו לאלהים עוזנו הריעו לאלהי יעקב
ג. ג שאו-זמרה ותנו-תף כנור נעים עם-נבל
ד. ד תקעו בחדש שופר בכסה ליום חגנו
ה. ה כי חק לישראל הוא משפט לאלהי יעקב
ו. ו עדות ביהוסף שמו-- בצאתו על-ארץ מצרים שפת לא-ידעתי אשמע
ז. ז הסירותי מסבל שכמו כפיו מדוד תעברנה
ח. ח בצרה קראת ואחלצך אענך בסתר רעם אבחנך על-מי מריבה סלה
ט. ט שמע עמי ואעידה בך ישראל אם-תשמע-לי
י. י לא-יהיה בך אל זר ולא תשתחוה לאל נכר
יא. יא אנכי יהוה אלהיך-- המעלך מארץ מצרים הרחב-פיך ואמלאהו
יב. יב ולא-שמע עמי לקולי וישראל לא-אבה לי
יג. יג ואשלחהו בשרירות לבם ילכו במועצותיהם
יד. יד לו--עמי שמע לי ישראל בדרכי יהלכו
טו. טו כמעט אויביהם אכניע ועל צריהם אשיב ידי
טז. טז משנאי יהוה יכחשו-לו ויהי עתם לעולם [ (Psalms 81:17) יז ויאכילהו מחלב חטה ומצור דבש אשביעך ]